
帝洛巴大師教言集TILO22བླ་མ་ནང་གི་སྒྲུབ་པ།
1-9-3a

༄༅། །བླ་མ་ནང་གི་སྒྲུབ་པ།
[༄། །བླ་མ་སྒྲུབ་པའི་རྒྱ་གཞུང་ནང་སྒྲུབ་ནཱ་རོ་པས་མཛད་པ་བཞུགས་སྷོ། །]༄༅། །རྒྱ་གར་སྐད་དུ། གུ་རུ་མི་ཏི་ན་མ། བོད་སྐད་དུ། བླ་མ་སྒྲུབས་(སྒྲུབ་)པ། རྡོ་རྗེ་འཛིན་པ་ལ་ཕྱག་འཚལ་ལོ། །ཨེ་མ་ཧོ་སངས་རྒྱས་སྐུ་གསུང་ཐུགས། །ཨེ་མ་ཧོ་
མཁའ་འགྲོ་གསང་བའི་སྐད། །གསང་བའི་མཛོད་ཏོལ་(རྟོལ་)བླ་མ་སྒྲུབ་པ་བྲི་བར་བྱ། །དུས་གསུམ་སངས་རྒྱས་དང་ནི་ཡི་དམ་ཕྱི་ནང་ལྷ། །རྒྱལ་སྲས་རྣམས་དང་དཔའ་བོ་རྣལ་འབྱོར་མ་འཁོར་ལོ། །འདི་སྒྲུབས་(སྒྲུབ་)པས་ནི་ཀུན་གྱི་དངོས་གྲུབ་ཐོབ། །དུར་ཁྲོད་རི་ཁྲོད་གནས་
དང་ཞིང་རྣམས་ན། །མཁའ་འགྲོ་མ་རྣམས་འདུ་བའི་གནས་དག་དང་། །བཀྲ་ཤིས་གནས་སུ་དམ་ཚིག་རྫས་རྣམས་བསགས། །ནང་གི་ཁྲུས་བྱས་འབོལ་བའི་སྟན་དག་ལ། །བྱམས་དང་སྙིང་རྗེ་དགའ་བ་བཏང་སྙོམས་སྒོམ། །ཛ་ཧཱུཾ་བཾ་ཧོཿས་དཀྱིལ་འཁོར་སྤྱན་དྲངས་
ལ། །མ་ཧཱ་གུ་རུ་ན་མ་ཏེ། །ནམཿམི། ན་མོ་ན་མཿ ཆུ་གསུམ་སྔོན་དུ་འགྲོ་བ་ཕྱིའི་མཆོད་པས་མཆོད། །ཤ་ལྔ་བདུད་རྩི་ལྔ་སོགས་ནང་གི་མཆོད་པས་མཆོད། །གསང་བའི་མཆོད་པས་དགྱེས་པར་མཛད་ནས་ནི། །ཡན་ལག་བདུན་པ་རྒྱས་བསྡུས་
གང་རུང་བྱ། །ཨོཾ་སྭ་བྷ་ཝ་ཞེས། ཆོས་ཀྱི་དག་པ་རྣམ་དག་དྲན་པར་བྱ། །དག་པ་ལུས་ཀྱིས་དཀྱིལ་འཁོར་སྒོམ་(བསྒོམ་)བྱ་སྟེ། །ཆུ་སྐྱེས་དང་ནི་ཉི་ཟླའི་གདན་ལ་ནི། །ཞལ་གཅིག་ཕྱག་གཉིས་འགྱེད་པའི་སྐུ་མངའ་ཞིང་། །སྒེག་ཅིང་དཔའ་ལ་ཞི་བའི་ཚུལ་འཛིན་
ཅིང་། །རུས་པའི་རྒྱན་སྤྲས་གར་གྱི་ཉམས་དགུར་ལྡན། །རྡོ་རྗེ་དྲིལ་བུ་འཛིན་ཅིང་ཕག་མོ་ལ་ནི་འཁྱུད། །གར་གྱིས་རོལ་པས་སྙོམས་པར་ཞུགས་པར་བསམ། །རྡོ་རྗེ་ཕག་མོའི་མཚན་ཉིད་ཅི་འདྲ་བཤད་པས་གསལ། །རྡོ་རྗེ་མ་ནི་སྔོ་ཞིང་ཌཱ་མ་རུ་དང་རྡོ་རྗེ་
1-9-3b

འཛིན། །རིན་ཆེན་མ་ནི་སེར་ལ་རིན་ཆེན་འཛིན། །པདྨའི་རིགས་ནི་དམར་ཞིང་ཀ་པཱ་ལ་ཡང་འཛིན། །ལས་ཀྱི་རིགས་ནི་རྡོ་རྗེ་རྒྱ་གྲམ་ལྗང་མདོག་མ། །བདེ་ཆེན་རིགས་ནི་དཀར་ཞིང་འཁོར་ལོ་འཛིན། །སྣ་ཚོགས་རིགས་ནི་ཕྱག་མཚན་སྣ་ཚོགས་ཅན། །གཙོ་བོ་སྐོར་ལ་
མཆོད་པ་བྱེད་པར་བསམ། །དེ་དག་ཀུན་ཀྱང་བཅུ་དྲུག་ལོ་ལོན་གཅེར་བུ་ཤ་རྒྱས་ཤིང་། །སྐུ་[མདོག་སེར་བའང་སྣང་།] ལ་དྲི་ཞིམ་དབུ་སྐྲ་དམར་སེར་གྱེན་དུ་བརྫེས། །བསིལ་(སིལ་)བུ་ཐུར་དུ་འཕྱང་ཞིང་ཧི་ཧིའི་སྒྲ་སྒྲོག་ཅིང་། །ཧ་ཧ་རྒོད་ཅིང་ཌཱ་མ་རུའི་སྒྲ་ཡང་འབྱིན། །ཕྱག་རྒྱ་ལྔ་དང་ལྡན་པར་
རབ་ཏུ་སྒོམ། །ཡི་གེ་བཞི་དང་ཕྱག་རྒྱའི་སྦྱོར་བ་ཡི། །སངས་རྒྱས་ས་ན་རབ་ཏུ་བཞུགས་པ་རྣམས། །དེ་རྗེས་ལྷ་ཚོགས་རྣམས་ལ་དགུག་གཞུག་བྱ། །དེ་རྗེས་ལྷ་མོ་རྣམས་ལ་དབང་སྐུར་ཞིང་། །རིགས་ཀྱི་བདག་པོས་རྣམ་པར་
བརྒྱན་བྱས་ནས། །ཕྱི་ནང་གསང་གསུམ་རྡོ་རྗེ་འཛིན་པས་མཆོད། །དེ་རྗེས་བསྟོད་པ་དག་གིས་བསྟོད་པར་བྱ། །ཡི་གེ་གསུམ་གྱིས་སྦྱོར་བས་བདུད་རྩི་མྱང་ཞིང་ལྷ་མོ་མྱོས་པར་བྱ། །མེ་ལོང་ནང་གི་གཟུགས་བརྙན་བཞིན། །རྫོགས་པར་སྒོམ་པ་གནས་
བྱ་སྟེ། །མཁའ་འགྲོ་གསང་བའི་སྐྲད་(སྐད་)ནི་སྒྲགས་པར་བྱ། །ཨོཾ་ཨཱཿ གུ་རུ་སིདྷི་ཧཱུཾ། ཨོཾ་བཛྲ་བེེ་རོ་ཙ་ནི་ཡེ་ཧཱུཾ་ཕཊ་སྭཱ་ཧཱ། ཨོཾ་ཨཱཿཧཱུཾ། བཛྲ་ཌ་ཀི་ནི། རཊྣ་ཌ་ཀི་ནི། པདྨ་ཌ་ཀི་ནི། ཀརྨ་ཌ་ཀི་ནི། བུད་དྷ་ཌ་ཀི་ནི། བྷི་ཤ་ཌ་ཀི་ནི། སིདྷི་ཤན་དྷི་ནཾ་ཀུ་རུ་ཡེ་སྭཱ་
ཧཱ། དུ་ཤཾ་ཀུ་རུ་ཡེ་སྭཱ་ཧཱ། ཝ་ཤང་ཀུ་རུ་ཡེ་སྭཱ་ཧཱ། མ་ར་ལ་ཕཊ། དི་རི་དི་རི་ཧྲི་ཧྲི་ཕེཾ་ཕེཾ། ཨི་དཾ་བྷ་ལིང་ཏ་ཁ་ཁ་ཁྷི་ཁྷི། མ་མ་རཀྵ་རཀྵ་ཧཱུཾ་ཧཱུཾ་ཕཊ་སྭཱ་ཧཱ། ཡི་གེ་ཕྲེང་བ་དཔའ་བའི་མིག་གི་བལྟས་ནས་ནི། །བློ་དང་ལྡན་པས་གསང་སྔགས་བཟླས་བྱས་ནས། །
1-9-4a

སངས་རྒྱས་སྲོག་འཕྲོག་དཔའ་བོ་མཁའ་འགྲོ་འདུ། །ས་རྣམས་གཡོ་ཞིང་དངོས་གྲུབ་ཆར་ཡང་འབབ། །དུས་དང་བསམ་པ་དམིགས་པར་བྱེད་པ་ལས། །རྡོ་རྗེ་མཁའ་འགྲོ་ཞི་བའི་ལས་རྣམས་འགྲུབ། །རྒྱས་པ་
རིན་ཆེན་མཁའ་འགྲོ་དབང་ནི་པདྨའོ། །འཇིག་རྟེན་མཁའ་འགྲོ་དྲག་པོའི་ལས་བྱེད་ཅིང་། །མངོན་སྤྱོད་ལས་ལ་གཤེགས་ཅིང་བྱང་ཆུབ་ཐོབ། །ཀ་པཱ་ལ་ནི་དམ་ཚིག་རྫས་ཀྱིས་བསྐང་། །སྦྱང་ཞིང་ཡི་གེ་རྣམས་ཀྱིས་བྱིན་གྱིས་རློབས། །གོང་གི་ཕྲེང་
སྔགས་ཀྱིས་ནི་དབུལ་བར་བྱ། །དེ་རྗེས་འདོད་པའི་དོན་ལ་གསོལ་བ་བཏབ། །སྐུ་གསུང་ཐུགས་དང་ཡོན་ཏན་འཕྲིན་ལས་དང་། །ཁྱད་པར་རྩ་བའི་དམ་ཚིག་བསྲུང་བར་བྱ། །ཕམ་པ་ལྟུང་བ་[སྦོམ་པོ།] ཉེས་བྱས་ཕྲ་མོ་བསྲུངས། །གསང་དབང་སྤྱད་སྒྲུབས་ཤེས་
པར་བྱ་བའི་དམ་ཚིག་བསྲུངས། །ཉམས་ན་ཚེ་འདིར་སྡུག་བསྔལ་ཕྱི་མ་དམྱལ་བར་ལྟུང་། །དམ་ཉམས་དེའི་རྗེས་ཕྱོགས་སུ་ཡང་འགྲོ་མི་བྱ། །དབུ་མར་ཚོགས་འཁོར་སྦྱིན་བསྲེག་འབུམ་ཕྲག་བདུན། །མེ་ཏོག་ཚོམ་བུའམ་གསང་སྔགས་
བྱེ་བ་བཟླས། །སྲོག་ཆགས་བྱེ་བའི་ཚེ་སྐྱབས་ཚེ་བཤགས་པའི་གདམས་པའོ། །ལུས་ལ་ཁྲག་ཕྱུང་མཎྜལ་བརྒྱ་རྩ་འབུལ། །རྟགས་མཐོང་སྣང་ཐོབ་བསྐང་བ་ཚད་འཁྱོལ་ཉེས་པ་དག །དུས་གསུམ་སངས་རྒྱས་བས་ཀྱང་བླ་མ་དམ་པ་ལྷག །རྡོ་རྗེ་
འཆང་དང་གཉིས་སུ་མེད་པར་སྒོམས་བྱས་ན། །བཟང་པོའི་རྒྱལ་བ་ཐམས་ཅད་སྒོམས་པར་འགྱུར། །བླ་མ་སྒྲུབ་ཅིང་རིག་པ་འདི་སྦྲགས་ན། །རྒྱལ་བ་ཀུན་གྱི་དངོས་གྲུབ་དེས་ཐོབ། །དེའི་སྐུ་མཐོང་རྒྱལ་བའི་དཀྱིལ་འཁོར་མཐོང་། །གསུང་ཐོས་པས་ནི་རྒྱུད་
1-9-4b

སྡེ་ཐོབ་འཐུང་ཤིང་། །དྲན་པ་ཙམ་གྱིས་སྒྲིབས་(སྒྲིབ་)སྦྱང་ཡོན་ཏན་བསྐྱེད། །སྐུ་གསུང་ཐུགས་ཀྱི་དྲག་པོའི་ཚུལ་བཟུང་ནས། །ལུས་ངག་ཡིད་གསུམ་སྒྲིབས་པ་དེ་དག་གིས། །སྤྱི་གཙུག་ཞབས་བཞག་བུམ་དབང་རབ་ཏུ་ཐོབ། །དེ་བཞིན་གསང་བ་ཤེས་རབ་བཞི་
པ་དང་། །མཆོག་གི་དབང་བསྐུར་བློ་ལྡན་གྱིས་ནི་ཞུས། །དམ་པ་འདི་མཆོད་བདེ་གཤེགས་མ་ལུས་མཆོད། །ལུས་ངག་ཡིད་གསུམ་རྩེ་(བརྩེ་)བའི་ཞབས་ཏོག་བྱ། །སྒྲིབ་པ་སྤྱོད་དང་ཚོགས་གཉིས་རྫོགས་པར་འགྱུར། །དམ་ཚིག་མི་ཉམས་ཉམས་ན་བཤགས་
པས་མཆོད། །མཁའ་འགྲོ་མི་འཁུ་མི་སྡོད་དབང་དུ་འདུས། །དངོས་གྲུབ་མ་ལུས་འགྲུབ་ཅིང་གྲུབ་པ་ཉམས་མི་འགྱུར། །གྲུབ་པ་བརྒྱད་དང་ཕྲ་མོ་རྣམས་ནི་མངོན་དུ་གྱུར། །ཨེ་མ་ཧོ། འདི་ནི་སངས་རྒྱས་ཀུན་དང་འདྲ། །དེ་མཉེས་ན་ནི་སངས་རྒྱས་
ཀུན་མཉེས་ཤིང་། །དེ་བརྙས་པས་ནི་སངས་རྒྱས་ཀུན་བརྙས་འགྱུར། །སྲོག་པས་གཅེས་པར་བཟུང་ཞིང་མིག་འབྲས་ལྟ་བུར་བརྩེ། །གཙུག་གི་ནོར་བུ་ལྟ་བུར་གསོལ་པ་གདབ། །དེས་ནི་ཕུན་སུམ་ཚོགས་པ་འགྲུབ་པར་འགྱུར། །དུས་གསུམ་སངས་རྒྱས་
ཀུན་གྱི་ཞབས་ཏོག་དུ་(ཏུ)། །རྡོ་རྗེ་འཛིན་པའི་སྒྲུབས་པ་འདི་བྱས་པས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །དྲི་མ་དང་བཅས་སྣོད་མིན་སྤེལ་བྱས་ན། །རྡོ་རྗེ་མཁའ་འགྲོའི་ཚོགས་ཀྱིས་དངོས་གྲུབ་འཇིག་བྱེད་ཅིང་། །ལོག་འདྲེན་གསུམ་པོས་བསད་ནས་སེམས་
ཅན་དམྱལ་བར་ལྟུང་། །རིན་ཆེན་ལྟ་བུའི་གང་ཟག་གིས་ནི་སྒྲུབ་པར་བྱ། །བླ་མ་ནང་གི་སྒྲུབ་པ་དཔལ་ན་རོ་པས་མཛད་པ་རྫོགས་སྷོ།། །།པཎྜི་ཏ་བི་བུ་ཏི་ཙནྟྲས་སྒྲ་རང་འགྱུར་དུ་བསྒྱུར་བའོ།། །།


目錄
བླ་མ་ནང་གི་སྒྲུབ་པ།